[center]قائد و أشعار[/center]

:::::::::
حبيبي
اديني مساحه علي قد ألامي اخترف فيها
ارفع قلمك عني بجد
والواد الحد
اللي جواك لو شد
نططه علي سور روحي يبص
وأكيد هيحس
لما يشوف بعنيه
علم الحزن مرفوع في النص
وجميع ابواب المعقول سد
""""""""""""""""""""""""""""""""""""""""""""""""""""

قصيدة أمي

:::::::
امي ...
انــــا
ضحكي خايف من بكايا
اناضحكي واقف يرتـعش
مرعوب ومستني النهايه
لينتصر
وتكون دي اول مـــره
فيها ينتصر
وعنّيه ما تملاهاالدموع
لينكسر
وأماله اللي اتصدعـت
تنزل امامه وتنكســر
والليـــل مـا يرحـل
م الضلوع
وتنتهي بنهايه صعبـه
الحكاية
امي....
انــــا
ضحكي خايف من بكايـا
انا ضحكي واقف يرتعش
مرعوب ومستني النهايه
""""""""""""""""""""""""""""""""""""""""""""""

قصيدة نهايه

::::::::
النايم علي ظهره وسط الشارع
واقفه فوق وشه ضفافع
مع بعض بيتفقوا يلعبوا غمايه
واحده اتغمت
والباقي اتفرق يتخبي
دي في طعنه من صاحبه
ودي ف طعنه من اهله
ودي ف طعنه م العالم
مش عارف ليه بعد الطعن
كنت بخش الاوضه
واقفل علي نفسي
واشاور للفارسين المرسومين ع الفازه
ينزلوا يتبارزوا
واما اسمع خبط علي الباب
اشاور ليهم
يرجعوا لمكانهم
واقوم امسح
بأديا عرقهم
واعدل ملابسهم
واقوم افتح
للسكين
"""""""""""""""""""""""""""""""""""""""""""""""""

قصيدة المحله

:::::::::
دم
الدبابات
ماليه شوارع المحلة ع الآخر
قاعدة بتشرب في سجاير وتضحك وتمضغ أطفالنا.
طيارات الأبتشي
مجنونة
بتطلع في لسانها
وهي نازلة قصف
في مباني مدينتي.
الجثث في شارع البحر
مالهاش عد علي الجهتين
عماله بتبكي.
القناصة
واخدين أماكنهم
قاعدين يصطادوا في
أنفاسنا الخارجة.
في ميدان الشون
أم محمد بتاعة الدرة
واقفة بتمسح
الدمع النازل من عين
ساعة الميدان
وف إيدها
حنجرة جوزها بتنقط دم.
في حي أبو شاهين
عم السيد أبو رحايه
غضبان جدا جدا
جاب سِلٌِم
يطلع عليه للسما
بعد ما شاف
راس ابنه هشام
محطوطة عارضه
حاطينها العسكر وبيلعبوا كورة
. في حي الرجبي
الجوامع
عمالة بتجري
متعاصة دم
بتدور علي الأطفال
تتخبي جوه صدورهم
جنود المظلات
نازلين يحاصروا جواب
واحد باعته لحبيبته.
أسلاك شايكة كتير كتير
مدقوقة حوالين مناخير بتعيط.
واحد ماشي في الشارع
ماسك زانه
بيحافظ بيها علي توازنه
علشان ما يقعش في بق الموت المستنية.
مجموعة من الناس
متحصنين
في مبني كبير قوي قوي م الوهم.
الشمس
ماسكينها من قفاها
ومقيدين إيديها من الخلف
وساحبينها
علي فين مش عارف.
شحات قاعد
فوق خريطة للوطن
ومادد قلبه
وبيبص بعينه لفوق لفوق
زنزانة كبيرة
ماشيه وسط الشارع
عمالة بتغني.
واحدة ست ماشية
بطنها قدام منها
حامل في بندقية. واحد
قاعد بيمارس الجنس
مع الحزن.
الخِيّمْ ماشية
تلم في الجثث من الشارع
وتدفنهم في مقبرة جماعية
المراحيض
عمالة بتضحك وبتتبول
في جناين المدينة.
سحابة محملة بالدم
جاية من مدن تانية
استقرت فوق مدينتي.
شخص بزمبلك
ماشي في الشارع عمال يتكلم
وِبْيفْضّي
وبتتمد إيد تملاه تاني وتاني.
فرقة موسيقية
ماشية بتعزف نشيد السٌكر.
لبان
ومصاصة
ومياه غازية
لابسين خوز وبيادات
وماسكين بنادق
وبيدوسوا علي الجثث اللي في الشارع.
العنكبوت
ناسج خيوطه علي وش راجل
قاعد جوه أودته
وبيتفرج علي التليفزيون
واحدة حاطة غسالة
وسط الشارع
وعمالة بتغسل في تاريخنا.
مذيعة
موطية
تعمل حديث قصيدة المحلهمع رِجل مقطوعة ومرمية علي الأرض.
الهوا بغضب شديد
عري المدينة خالص.
واحد خاين
ماشي بيضحك
حاشي سنانه المسوسة
بعضم أحلامنا
الأمراض كتيرة
بتلعب كوتشينة
في الشارع
وفي البيوت
وعلي العتبات
الجوع
ماشي كل ما يقابله حد في سكته
ياكله
""""""""""""""""""""""""""""""""""""""""""""""""""""""

قصيدة غاضب

:::::::::
يس , انك لمن المخلصين، ولكن طعنتك السماء والأرض بالسكين،فأصبحت كاالعاصفة ، أصبحت بدون عاطفة ، وخلطت النار بالطين ، الا مع الطيبين
ــــــــ
انا عاصفه
تطيح بكل شيء
بالشجر بالسحاب بالسما
لما احس بخيانة صديق
بامشي وقلبي اللي حب
مطعون بسيف الكدب
لكن ما بنزف دم
على كل شيء كان وهم
واشوط كل المبادىء
مش انا اللي بادىء
دول علقوا المشانق
للصدق من غير ذنب
او قات بكون مجنون
واوقات بكون عاقل
قلبي طيب حنون
لكن ما بتساهل
بنزع قلبي بإيدي
وبكون عديم القلب
أنا لما بغضب بكون
صعب صعب صعب
"""""""""""""""""""""""""""""""""""""""""""""""""""""""